Odaia de Sus

Rugăciunea domnească

Tatălu a nostru, cari eşti tu ţeruri, sînţească-si numa a ta; s-vină amirăriļea a ta; s-hibă vrearea a ta, după cumu tu ţeru, aşi ş-pri locu.

Pînea a noastră aţea di tute dzîlile dă-nă-u a noauă asîndzî; ş-nă ļiartă a noauă amîrtiile a noastre, după cumu ş-noi ļirtămu aţiloru ţe nă ftisescu a noauă; ş-nu nă du pri noi tu ispită, ţi n-ascapă di-aţelu arău. Amin.

Rugăciunea a Sîntului Efrem

Doamne ş-afindico a banăļei a meale, nu-ñi dă a ñia pnevma a leaniļei, a frundidîļei di multe, a vreariļei di dumnie ş-a grăiriļei tu irñie. Iară pnevma a curăţîļiļei, a tăpinusiriļei, a arîvdariļei ş-a vreariļei dursea-le a ñia a roblu a tălu. Aşi, Doamne Amiră, dursea-ni a ñia, tra s-ñi vedu alathurile a meale, şi s-nu giudicu pri fratile a melu; că ghine eşti cuvîntatu tu eta a etiloru. Amin.

Pistipsirea

Pistipsescu tu unu Dumnidzău, Tatălu atutţînîtorlu, făcatorlu a ţerlui ş-a loclui, a vidzutiloru a tutuloru ş-a nividzutiloru.

Şi ntru unu Domnu Iisus Hristos, Hiļilu alu Dumnidzău, unlu amindatu, cari ditu Tatălu si-are amindată ma nîinte di tute etile, lunină ditu lunină, Dumnidzău adivăratu ditu Dumnidzău adivăratu, amindatu iară nu faptu, aţelu di ună hiinţă cu Tatălu, pritu cari tute si-au faptă.

Cari tră noi oaminiļi ş-tră a noastră ascăpare  si-are dipusă ditu ţeruri şi si-are ntrupată di la Duhlu Sîntu ş-ditu Maria Parthena şi si-are faptă omu.

Şi si-are arăstignită tră noi, tu dzîlile alu Ponţiu Pilat ş-are ipufirsită şi si-are ngrupată.

Ş-are anviată a treia dzuă , după Scriituri.

Şi si-are alinată la ţeruri şi şade nandreapta a Tatălui.

Ş-iară va s-vină cu mărire, tra s-giudică viiļi ş-morţîļi, ş-amirăriļea a lui nu va aibă bitisire.

Şi ntru Duhlu Sîntu, Domnulu di bană făcătorlu, cari di la Tatălu s-tradze, aţelu ţe dadunu cu Tatălu ş-cu Hiļilu easte ncļinatu ş-măritu; cari are grăită pritu prufiţ.

Tu una sîntă, catholichească ş-apostolească Bisearică.

Mîrtirsescu unu pitedzu ntru ļirtarea a amîrtiiloru.

Aşteptu anviarea a morţîloru ş-bana a etiļei ţe va s-hibă. Amin.

Aţeale dzaţe diităgii alu Dumnidzău

1. Mine escu Domnulu Dumnidzău a tălu; s-nu ai alţî dumnidzadz nafoară di mine; s-nu-ţ faţi chipu ciuplitu, tra s-ti ncļiñi a lui.

2. S-nu dzîţi numa a Domnului Dumnidzălui a tălu digeaba.

3. Adu-ţ aminte si sînţăşti dzua a Domnului.

4. Tiñisea pri tatălu a tălu ş-pri muma a ta, tra s-ţă hibă ghine a ţăia şi s-bînedz multu pri locu.

5. S-nu vaţîñi.

6. S-nu faţi  fapte nicurate.

7. S-nu furi.

8. S-nu mîrtirseşti strîmbu contra a aproapilui a tălu.

9. S-nu hii hărbutu după muļiarea a aproapilui a tălu.

10. S-nu ipithimiseşti casa a aproapilui a tălu, ş-niţi vîrnă lucru ţe easte a lui.

* * *

Transcrierea aromână a Rugăciunii Domneşti şi a Crezului au fost preluate din ediţia Noului Testament realizată de Apostol N. Caciuperi în anul 1970.